على “سفرة طنط زيزي “.. أسهل الطرق لتحضير حلويات العيد

كل سنة وكل الأمة العربية والإسلامية بخير بمناسبة عيد الفطر، النهارده هانعمل مع بعض كل الحلويات الخاصة بالعيد؛ زي الكحك والبيتي فور، والغريبة، والبسكويت، لأن العيد مابيبقاش له طعم من غيرهم.

كحك العيد

المقادير:
كيلو دقيق
½ كيلو سايحة
ملعقة كبيرة سمسم غير محمّص
ملعقة صغيرة ريحة كحك
كوب ماء دافئ للعجن
قطعة خميرة بيرة
رشة ملح

الطريقة:
1- انخلي الدقيق في وعاء واخلطيه مع رشة الملح، وبعدين اعملي فتحة في نصف الدقيق وحطّي فيها السمسم، وبعد كده ضيفي الزبدة في الفتحة دي تدريجيا مع التقليب باستخدام ملعقة خشبية، لغاية ما الدقيق يختلط تماما بالزبدة، وبعد كده سيبي الخليط يبرد شوية.

2- في الوقت ده دوّبي الخميرة مع ملعقة سكر وربع كوب ماء وسيبيها تخمر لحد ما يتضاعف حجمها.

3- بعد ما العجينة تبرد، ابدئي في خطوة البسّ؛ وهي إنك تفركي الدقيق كويس بكف إيدك لغاية لما تحسّي إن الدقيق كله تشرّب تماما بالزبدة.

4- بعد كده حطّي ريحة الكحك والخميرة وباقي كمية الماء تدريجيا، وبعد كده ابدئي لمّي العجينة من بره على جوّه، مع الضغط عليها بكف الإيد، لغاية ما تحصلي على عجينة متماسكة تقدري تشكّليها كويس بإيدك، بس خلّي بالك ما تزوديش الميه عن الكمية المكتوبة؛ لأن الميه بتخلّي الكحك يبقى ناشف.

5- غطّي العجينة بقطعة قماش نضيفة، وسيبيها تخمر لمدة ساعة، وبعد كده ابدئي قطّعيها قطع صغيرة، وشكّليها بقوالب الكحك ورصّيها في الصاجات أو الصواني بحيث إنهم يكونوا بعيد عن بعض، وسيبي الكحك شوية كمان في الصاج علشان يخمرّ.

6- دخّلي الصاج في فرن متوسط الحرارة، وسيبيه لغاية ما الكحك يستوي ويبقى لونه دهبي، وبعدين طلّعيه، وعند التقديم رشّي على الوش سكر بودرة.

ملحوظة:
لنجاح عجينة الكحك لازم تدعكيها لفترة كافية وتسيبيها مدة علشان تخمرّ.

*****************

بسكويت النشادر

الطريقة:
3 كوب دقيق
كوب نشا
كوب زبدة
كيس بيكينج باودر
لبن عند الحاجة
كيس فانيليا
2 بيضة

الطريقة:
1- اضربي السكر مع السمنة كويس لحد ما يكوّنوا خليط ناعم ومتجانس، واضربي البيض مع الفانيليا كويس وضيفيه على خليط السكر والسمنة.

2- اخلطي الدقيق مع البيكينج باودر، وضيفيهم على الخليط السابق بالتدريج لغاية مع العجن المستمر لغاية ما تحصلي على عجينة متجانسة.

3- شكّلي البسكويت بالطريقة اللي تحبّيها، ورصّيه في الصواني بعد ما تدهنيها بطبقة خفيفة من الزيت، ودخّليهم الفرن على درجة حرارة متوسطة لحد ما البسكويت يبقى لونه دهبي، وبعد كده طلّعيه وسيبيه يبرد شوية قبل ما ترصّيه في طبق التقديم.

*****************

الغريّبة

المقادير:
2 كوب دقيق
كوب سكر بودرة
كوب زبدة
رشة ملح
لوز للتزيين

الطريقة:
1- حطي الزبدة والسكر في طبق واضربيهم بالمضرب الكهربائي لحد ما يبقوا زي الكريمة.

2- حطي الملح على الدقيق وضيفيهم بالتدريج على الخليط وقلبيهم بإيدكي حتى تتماسك العجينة.

3- شكلي العجينة على هيئة كرات صغيرة الحجم، وحطي في منتصفها اللوز أو أي نوع مكسرات.

4-  هاتي صينية ورصي فيها الغريبة بس سيبي مسافة بين كل واحدة، ودخليها الفرن على درجة حرارة متوسطة لمدة 10 دقائق.

ملحوظة:
الغريبة لونها مش بيكون ذهبي بيبقى بيج فاتح، وعلشان العجينة تنجح لازم تضربي السمنة مع السكر كويس لحد ما يبقوا عاملين زي الكريمة البيضاء.

*****************

بيتي فور

المقادير:
2 كوب دقيق
½ كوب سكر بودرة
½ ملعقة صغيرة بيكنج بودر
ملعقة صغيرة فانيليا
كوب سمن
بيضة

الطريقة:
1- اضربي السمنة مع السكر جيدا لحد ما يبقوا زي الكريمة، اضربي البيض مع الفانيليا وحطيهم على السمنة والسكر.

2- ضيفي البيكنج بودر على الدقيق وضيفيهم على الخليط السابق بالتدريج مع التقليب ببطء، لحد ما يبقوا عجينة متماسكة.

3- شكلي العجينة بالشكل اللي تحبيه، ورصيها في الصينية، ودخليها فرن متوسط الحرارة لحد ما تحمر على خفيف.

4- خرجي البيتي فور من الفرن وسيبيه يبرد، ممكن تقدميه بالشكل ده، وممكن تلزقي كل اتنين بالمربى وترشي عليهم شوكولاتة مجروشة أو جوز هند أو مكسرات.

ملحوظة:
لو عاوزة البيتي فور بالشوكولاتة ممكن تستغني عن ملعقتين دقيق وتضيفي ملعقتين كاكاو على العجينة، وعلشان تتأكدي من سُمك العجينة دخلي واحدة أو اتنين الفرن ولو اتسعت في الصينية ممكن تضيفي دقيق زيادة.

 

وبكده خلصت وصفاتنا النهارده..