بالصور.. أغرب أشكال الكيك اللي ممكن تشوفها في حياتك

الإبداع مالوش حدود، لكن لما يجتمع الإبداع مع الأكل بتكون النتيجة إنك تقف مذهول وتقول: “مش ممكن ده يكون كيك دي حاجات حقيقية أكيد! أنا مش مصدق على فكرة……..

1- كيكة الثعبان البورمي الأبيض
الكيكة دي اتعملت في عيد ميلاد بنت عندها 6 سنوات، اختار أهلها الشكل ده علشان يفاجئوها لأنها كانت مغرمة بالثعبان البورمي الأبيض في آخر مرة زارت فيها حديقة الحيوان.

الطريف في الموضوع إن بعض الآباء رفضوا إن أولادهم يقربوا من الكيكة دي.

لو عايز اندهاشك يزيد اعمل بحث على موقع Google علشان تشوف شكل الثعبان البورمي الحقيقي وحاول تقارنه بالكيكة اللي موجودة في الصورة، وابقى ابعت لنا الفرق.

2- كيكة كومبو
الكيكة دي عملتها ديبي جورد -أشهر واحدة بتعمل كيك مشابه للواقع في سان فرانسيسكو- وعلى الرغم من إنها محترفة في الفن ده لكن الكيكة دي احتاجت لأسابيع علشان تقدر تعملها بكل التفاصيل اللي فيها، من أول كوباية الحاجة الساقعة لغاية أصابع البطاطس المحمرة وساندوتش الهامبرجر.

3- كيكة البلاكبيري
هيكون إيه إحساسك وإنت بتاكل تليفون بلاكبيري؟!

الكيكة دي عملتها ديبي جورد برضه، وقدرت تنقل فيها كل تفاصيل التليفون، للدرجة اللي تخليك تخاف إنك تفكر تاكله لأن أكيد سعره غالي أوي.

4- كيكة اللحمة الباردة
الكيكة دي ممكن تقدموها لضيوفكم على إنها أكلة وتحلية في نفس الوقت، لأن شكلها حقيقي للدرجة اللي تخلي الضيوف ممكن ياكلوها وهما متأكدين إنهم بياكلوا لحمة فعلا.. بس يا ترى الكيكة هتكون بطعم اللحمة؟!

5- كيكة العنكبوت
على الرغم من إن شكلها فعلا مخيف وخصوصا للناس اللي عندها رعب من العناكب، لكنك مش هتقدر تمنع نفسك من إنك تتفرج عليها عن قرب وتركز في كل تفاصيلها علشان تتأكد إنها حقيقية ولّا لأ.

الكيكة دي عملتها سيسيليا تشالمرز لعميل يعاني رعبا من العناكب وقرّر إنه يجرب ياكلها علشان يتغلب على خوفه منها.. تفتكروا الطريقة دي هتنفع؟!

6- كيكة الاسكارف الشتوي المبهج
أعتقد الكيكة دي هتكون مناسبة جدا في الشتاء لأنها كفيلة إنها تمنحكم جرعة كبيرة من الدفء، سواء لأنها بتشبه جدا أي اسكارف بألوان مبهجة موجود عندكم في الدولاب أو بسبب كمية السكريات اللي موجودة فيها.

[portfolio_slideshow]