نفى الفنان أحمد مكي وجود حساب شخصي له على موقع التواصل الاجتماعي “الفيس بوك”، عبر أغنية جديدة بعنوان “فيس بوكي” شاهدها ما يقرب من مليون شخص خلال أسبوع على موقع الفيديوهات “اليوتيوب”.
ورغم أن هذه الأغنية تهدف إلى القضاء على صداع صفحات “الفيس بوك” التي طالما اشتكى منه مكي، فإن الصفحات التي تنتحل شخصيته نقلت الأغنية على أنها من أحدث أعماله دون الالتفات للهدف منها.
ووصل عدد الصفحات التي تنتحل شخصية مكي إلى أكثر من 60 صفحة، أشهرها صفحة وصل عدد أعضائها حتى الآن إلى أكثر من 743 ألفًا.
وعكست تعليقات الأعضاء بهذه الصفحة على الأغنية أنهم غير مقتنعين بعدم وجود حساب لمكي على “الفيس بوك”.
وقال مصطفى أبو الوفا: “أغنية جامدة يا مكي، وإحنا عارفين أن الصفحة دي بتاعاتك لأن اللينك بتاعها موجود على موقعك الرسمي”.
وأشاد حمادة المصري هو الآخر بالأغنية، مضيفًا: “بجد فكرة الأغنية جمدة جدًا أستاذ أحمد. والله أنت بجد نجم الشباب ودماغك قنبلة والله.. أنا حلمي أني أغني معاك كلمتين بس في أي أغنية.. أنا عارف أني رغيت كتير بس والله أنا من أشد المعجبين بيك”.
أغنية “فيس بوكي” من تأليف وألحان أحمد مكي وتوزيع شادي السعيد، وهندسة صوت تامر الزويبي، وإخراج أحمد الجندي،والاغنية كلماتها تقول
Are you ready?
خد دي
انا ماليش أكونت علي الفيس بوك اسمع من مكي
خلوا بالكم من اللي بيعمل فيسبوكه انه فيس بوكي
حاول تحلقله تنفضله فكك منه او فكي
مهما قالك وحلفلك وبعتلك صورته او صورتي
انا ماليش أكونت علي الفيس بوك اسمع من مكي
خلوا بالكم من اللي بيعمل فيسبوكه انه فيس بوكي
حاول تحلقله تنفضله فكك منه او فكي
مهما قالك وحلفلك وبعتلك صورته او صورتي
نازل من البيت بالليل اجيب فول بيض زبادي وفينو
العشا الرسمي في مصر طبعاً كلنا عارفينه
قابلت واد من الحتة فاقد وفقري واسمه نينو
معمي ميه ودخان وبيهذي يخريب بيت سينيه
قاللي ينفع يامكي علي الفيس بوك اعملك اد
انا واحمد معتز وطارق وعماد
وانت تنفضلنا التنفيضة السودا دي خد ياد
اعملنا اد .. اعملنا اد
مش مهم معتز وطارق المهم أنا وعماد
قولتله يابني انت بتهذي ولابتتكلم جد
انا من زمان بيني وبين الفيس بوك ميت سد وسد
اخري كان الـHi 5 يمكن والـ Icq
هتقولي عندك فيس بوك .. هاقولك دام يو
خدني من ايدي لبيته يوريني اصل الموضوع
ام فاتح الفيس بوك لاقيت 30 اكونت مصنوع
حاطين صورتي وكاتبين اسمي وعاملين نفسهم انا
وكل واحد فيهم بيكلم الاف في السنة
هاموت واعرف بيقولوا ايه للناس علي لساني
دي حاجة تخوف ترعب حط نفسك مكاني
لسه مفوقتش من الصدمة ام نينو وراني حاجة تاني
فتحلي علي الفيس بوك فان بيج فيها مية الف فان
كاتبين كلام جميل خلي قلبي مرفرف فرحان
شكرا لكل اللي كتب ان كان ليدي او مان
ملحقتش افرح راحت الفرحة بقيت قاعد غضبان
اصل لاحظت ان اللي عامل الصفحة عيل كتيان
متقمصني وبيتكلم زي دبور في فيلم مرجان
كبر جيهك روق ديهك اخبط دي يامان
سلطاتك بابا غنوجك واضربلك خابور كمان
ركزت قريت كل اللي كاتبه الواد ده لاقيته هباب
دخلت في لحظة كتبت لكل الصفحة ده واد نصاب
مسح اللي كاتبته بسرعة ورد وقال هو الكداب
فجأة الكل قفش كشر كان ناقص يرموني قبقاب
وبعتلي شتيمة عملي بلوك وطردني طرد كلاب
يقطع النت علي النتيتة علي اللي ينتتوا عليه
دورت اكتر لاقيت صفحات باسمي علي النت كتيرة
كل ما افتح صفحة الاقيها مالينة فتاوي كتيرة
اخبار حصري علي لساني اصله ادانى التاشيرة
وعلاقتي بالناس دي زي علاقة الدولارت بالليرة
معرفش عنهم حاجة ولاحتي بتجمعنا الجيرة
ربنا يشفيهم دول ناس عيانة مش ناس شريرة
كل ساعة بتصريح متفبرك ليا وكله حماسة
اشي فن واشي اخبار شخصية وفتي في دين وسياسية
الاغرب إني بلاقي ناس عاقلة كبيرة وبتصدق
وبتاخد كل اخباري المكذوبة منهم وتفرق
والفتية تفضل تكبر تنتشر تضخم تترستق
تتزوق تتروق تترقي لاشاعة وتتصدق
تاني يوم بالاقيها اخبار فنية اتشل
وقفت مع نفسي وقفة طويلة ولاقيت الحل
قررت اعمل اغنية اني ماليش أي أكونت أو سايت
لو قابلك أي مكي علي النت قوله جود نايت
انا ماليش أكونت علي الفيس بوك اسمع من مكي
خلوا بالكم من اللي بيعمل فيسبوكه انه فيس بوكي
حاول تحلقله تنفضله فكك منه او فكي
مهما قالك وحلفلك وبعتلك صورته او صورتي
انا ماليش أكون علي الفيس بوك اسمع من مكي
خلوا بالكم من اللي بيعمل فيسبوكه انه فيس بوكي
حاول تحلقله تنفضله فكك منه او فكي
مهما قالك وحلفلك وبعتلك صورته او صورتي
جــــــــــــــــــاااااااااااااااااااامـــــــــــــــــد جــــــــــــدددددددددى